【諗唔到點答？善用停頓的藝術】
聽完問題，可以馬上講出答案，我哋會認為呢個人頭腦清醒，轉數快，應對能力超強。就係呢個光環，令好多人為咗俾對方良好印象，聽完問題未仔細思考，就衝口而出一邊答，一邊繼續諗。口才好嘅朋友，都尚算可以咁做，但口才麻麻地嘅，不妨善用一下「停頓的藝術」。
「尷尬沉默法則」（The Rule of Awkward Silence）係指對住好難、充滿挑戰性嘅問題，其實可以唔使即刻答，反而停一停諗一諗，用10 秒、20 秒或者更長時間，組織好再答問題。你可能會擔心，對方咪會覺得自己好廢？美國商業雜誌《Fortune》有一篇文章講過，Tim Cook喺meeting出名習慣以長時間、令人唔舒服嘅停頓位見稱；而Jeff Bezos亦會喺meeting前吩咐所有人沉默30分鐘，先專心閱讀手頭agenda做準備。兩位咁出名嘅CEO都有呢個習慣，係咪立即令你對「停頓一下再作答」信心大增先？
不過喺香港，秒秒鐘幾百萬上落，咩都講求要快，「停頓的藝術」會唔會唔太岩用呢？我自己就咁睇，如果未諗清楚，就一輪嘴答問題，但係又講唔到重點，對方亦拎唔到想要答案，其實只係做到「快」，但做唔到「狠」同「準」，就算幾快都無用喇！相比之下，寧願你先沉思一會，將問題抽絲剝繭，組織好晒先答人。一來面對難題，經過思考先答，對方會覺得出自真心，唔係未經大腦求其答；二來搶住答再繼續諗，自然出現轉彎抹角無養分內容，對方聽落認為你詞不達意，隨時對你表達能力大扣分。
說話同行動一樣，快思慢想，保持謹慎，不做多餘事，不說多餘話，做到例不虛發。「快」不如「慢」，「狠」不如「穩」！
Search